Մեքսիկական բանակն ուրբաթ երեկոյան հաղորդել է, որ հյուսիսային սահմանամերձ Նուեւո Լարեդո քաղաքում ջոկատի հրամանատար գնդապետն առեւանգվել է Խալիսկոյի թմրակարտելի կողմից, հաղորդում է AP-ն:

Գնդապետ Խոսե Իսիդրո Գրիմալդո Մունյոսի առեւանգումը տեղի է ունեցել ավելի հարավ, երբ նա արձակուրդում է եղել Խալիսկո նահանգում, որտեղ տեղակայված է կարտելը:

Սա կարտելների կողմից արդեն երկրորդ հարձակումն է մեքսիկական բանակի սպայի վրա մեկ ամսից պակաս ժամանակահատվածում։

Գեներալ Կրիսոֆորո Մարտինես Պարրան ասել է, որ կորած գնդապետը հանգստանում էր Խալիսկո նահանգի Տապալպա քաղաքում գտնվող գյուղական տնակում, երբ նրան առեւանգել են կարտելի զինված անդամները ճանապարհատրանսպորտային պատահարից հետո:

«Նրան երկու ավտոմեքենայով ձերբակալել են զինված անձինք, որոնք բռնի ուժով դուրս են բերել գեներալին եւ տարել անհայտ ուղղությամբ»,- ասված է ՊՆ հաղորդագրության մեջ։

Բանակում հայտարարել են, որ Գրիմալդո Մունյոսը «լավ մասնագիտական փորձառություն» ուներ եւ գերազանց ծառայել էր Նուեւո Լարեդոյում՝ քաղաք, որտեղ գերակշռում է «Հյուսիսարեւելյան» կարտելը, որը հին «Զետաս» կարտելի ճյուղն է:

Դեռեւս անհայտ է, թե որեւէ կապ ունի արդյոք «Հյուսիսարեւելյան» կարտելը Խալիսկոյի հանցախմբի հետ: Պաշտպանության նախարարությունը հայտնել է, որ որոնումները շարունակվում են։

Նոյեմբերին բանակի գեներալը, որը ծառայում էր Մեքսիկայի ազգային գվարդիայում, սպանվել էր հյուսիս-կենտրոնական Սակատեկաս նահանգում փոխհրաձգության ժամանակ:

Գեներալ Խոսե Ուրսուա Պադիլիան այդ նահանգում գվարդիայի ամենաբարձր պաշտոնյան էր։ Նա զոհվեց թմրակարտելի ենթադրյալ զինյալին հետապնդելիս մի վայրում, որտեղ Խալիսկոյի ավազակախմբերը տարածքի համար պատերազմներ են մղում մրցակից «Սինալոա» կարտելի եւ դաշնակից խմբավորումների դեմ: