նախընտրելի դարձնել
Հաջորդ ֆինանսական ճգնաժամը կառաջանա մասնավոր կրիպտոարժույթների պատճառով, եթե այդ ակտիվներին թույլ տրվի աճել, նախազգուշացրել է Հնդկաստանի կենտրոնական բանկի ղեկավարը, հաղորդում է CNBC-ն։
«Կրիպտոարժույթները… հսկայական անբաժանելի ռիսկեր են պարունակում մեր մակրոտնտեսական եւ ֆինանսական կայունության համար»,- միջոցառման ժամանակ հայտարարել է Հնդկաստանի պահուստային բանկի կառավարիչ Շակտիկանտա Դասը: Որպես օրինակ՝ նա մատնանշել է FTX-ի վերջին կրախը:
Նա նշել է, որ իրեն ամենաշատն անհանգստացնում է, որ կրիպտոարժույթները չունեն որեւէ բազային արժեք՝ դրանք անվանելով «սպեկուլյատիվ», եւ հավելելով, որ դրանք պետք է արգելել։
«Սա [կրիպտոարժույթի մասնավոր առեւտուրը] 100% սպեկուլյատիվ գործունեություն է, եւ ես դեռ այն կարծիքին եմ, որ այն պետք է արգելել… որովհետեւ եթե դրան թույլատրվում է աճել, եթե դուք փորձում եք այն կարգավորել եւ թույլ եք տալիս նրան աճել, ապա հաջորդ ֆինանսական ճգնաժամը կառաջանա մասնավոր կրիպտոարժույթներից»,- ասել է Դասը:
Դասի մեկնաբանությունները հնչել են այն ժամանակ, երբ կենտրոնական բանկը պնդում է հնդկական ռուփիի սեփական թվային տարբերակը: Հնդկաստանի Պահուստային բանկը դեկտեմբերի 1-ին գործարկել է թվային ռուփիի փորձնական ծրագիր՝ որոշակի քաղաքներում մանրածախ օգտագործման համար: Որոշ օգտատերեր կարող են գործարքներ կատարել՝ օգտագործելով թվային ռուփին՝ հավելվածների եւ բջջային դրամապանակների միջոցով:
Թվային ռուփին կենտրոնական բանկի թվային արժույթի տեսակ է (CBDC): Աշխարհի շատ կենտրոնական բանկեր ուսումնասիրում են սեփական արժույթի թվային տարբերակների թողարկման հնարավորությունը:
Դասն ասել է, որ CBDC-ն կարող է արագացնել միջազգային դրամական փոխանցումները եւ նվազեցնել լոգիստիկայի անհրաժեշտությունը, ինչպիսին է թղթադրամների տպագրությունը:
Չինաստանի կենտրոնական բանկը CBDC-ի մշակմամբ աշխարհում ամենահեռուն է գնացել: Պեկինը 2020 թվականի վերջից փորձարկում է իր թվային յուանի օգտագործումը իրական աշխարհում՝ ընդլայնելով դրա հասանելիությունը ավելի շատ օգտվողների համար այս տարի:
Այս տարի թվային արժույթի կարգավորումը ուշադրություն է գրավել կրիպտոարժույթների շուկայի արժեքի 1,3 տրիլիոն դոլարի անկումից եւ FTX բորսայի աղմկոտ փլուզումից հետո:
Չինաստանը փաստացի արգելել է կրիպտոարժույթների առեւտուրը:
Հնդկաստանի կառավարությունն աշխատում է կրիպտոարժույթի մասին օրենսդրության վրա, որը կարող է արգելել թվային արժույթի որոշ գործունեությունը, միաժամանակ ստեղծելով իրավական դաշտ կենտրոնական բանկի թվային արժույթի համար:
