Կիրակի առավոտյան Թեհրանում շարունակվում են ինտենսիվ ռմբակոծությունները, մայրաքաղաքի մի քանի թաղամասերում պայթյուններ են որոտացել, հաղորդում են իրանական լրատվամիջոցները:

Վերջին մեկ ժամվա ընթացքում Fars գործակալությունը հայտնել է քաղաքում մի քանի նոր պայթյունների մասին, որոնք հաջորդել են կիրակի գիշերվա հարձակումներին: Պետական լրատվամիջոցները տեսանյութ են հրապարակել, որտեղ երևում են շաբաթ երեկոյան Թեհրանի արևմտյան բնակելի թաղամասի վրա հարձակման հետևանքները:

Մթնշաղին դեպքի վայր հասած թղթակիցը հայտնել է, որ հարվածի հետևանքով զոհեր չկան, սակայն ինը մարդ վիրավորվել է, վնասվել է ավելի քան 20 բնակելի տուն:

Fars և Mehr գործակալությունների տելեգրամյան ալիքներում տեղադրված տեսանյութում երևում է ավերված բնակելի շենքի մի մասը. խոհանոցն ու հյուրասենյակը ծածկված են փլատակներով, իսկ մեքենաները՝ փոշու հաստ շերտով:

Իսրայելի բանակը (ՑԱՀԱԼ) հայտարարել է, որ շաբաթ օրը «Թեհրանի սրտին» հասցված հարվածների ընթացքում խոցել է ժամանակավոր հրամանատարական կենտրոններ և զենքի արտադրության օբյեկտներ: