նախընտրելի դարձնելԼիբիայում հակամարտող կողմերի առաջնորդները՝ ազգային միասնության կառավարության ղեկավար Ֆայեզ աս-Սարաջը եւ Լիբիայի ազգային բանակի հրամանատար Խալիֆա Խաֆթարը համաձայնություն են ձեռք բերել 2018 թվականին խորհրդարանական եւ նախագահական ընտրությունների անցկացման շուրջ: ՌԻԱ Նովոստիի փոխանցմամբ՝ այս մասին հայտնել են Եգիպտոսի զինված ուժերը:
Լիբիայում քաղաքական դիմակայությունը հաղթահարելու համար Եգիպտոսի կազմակերպած բանակցություններն անցկացվել են Կահիրեում:
Ընտրությունների անցկացման ժամկետից բացի՝ ձեռք բերված համաձայնության փաստաթղթով ենթադրվում է, որ Լիբիայի արեւելքում խորհրդարանի պատգամավորներից եւ Գերագույն պետական խորհրդի անդամներից կազմված համատեղ հանձնաժողով է ստեղծվելու, որը պետք է համաձայնեցնի սահմանադրական հռչակագրում համապատասխան փոփոխությունների համար անհրաժեշտ օրենսդրական ակտերը:
Կողմերը նաեւ պայմանավորվել են չանդրադառնալ Լիբիայում ձեւավորված ստատուս-քվոյին. կառավարությունների բարձրագույն ղեկավարները կշարունակեն զբաղեցնել իրենց պաշտոնները՝ «մինչեւ անցումային ժամանակաշրջանը եւ 2018 թվականին նոր խորհրդարանի ու նախագահի պաշտոնավարումը»:
