նախընտրելի դարձնել
Դուբայը ներկայացրել է 32 տրիլիոն դիրհամի (8,7 տրիլիոն դոլար) տնտեսական ծրագիր, որը ներառում է արտաքին առեւտրի եւ ներդրումների կրկնապատկում հաջորդ տասնամյակի ընթացքում, որպեսզի բարձրացնի իր կարգավիճակը որպես համաշխարհային ֆինանսական կենտրոն, գրում է Bloomberg-ը:
Էմիրությունը, որը մտնում է Արաբական Միացյալ Էմիրությունների դաշնության մեջ, Մերձավոր Արեւելքի բիզնես եւ ֆինանսական կենտրոնն է։ Այն արդեն խորացնում է առեւտրային ուղիները եւ աշխատում է ներգրավել համաշխարհային ընկերությունների, քանի որ բախվում է տարածաշրջանային աճող մրցակցությանը:
Նախատեսվում է, որ մինչեւ 2033 թվականը արտաքին առեւտուրը կկազմի 25,6 տրիլիոն դիրհամ, քանի որ քաղաքը կհամալրի իր համաշխարհային գործընկերների շարքը: Դուբայը նաեւ ձգտում է տարեկան մոտ 60 միլիարդ դիրհամի օտարերկրյա ուղղակի ներդրումներ ներգրավել, Twitter-ում գրել է Դուբայի կառավարիչ Շեյխ Մուհամմեդ բեն Ռաշիդը:
Դուբայի տնտեսությունը շարունակել է հետհամաճարակային վերականգնումը 2022 թվականին եւ նախորդ տարվա առաջին ինն ամիսներին տարեկան աճել է 4,6%-ով։ Սակայն նրա երկարաժամկետ աճի պլանը հայտնվել է համաշխարհային մռայլ հեռանկարի պայմաններում: Արժույթի միջազգային հիմնադրամն ակնկալում է, որ այս տարի համաշխարհային տնտեսության մեկ երրորդը կհայտնվի ռեցեսիայի մեջ, երբ ԱՄՆ-ը, Եվրոպան եւ Չինաստանը միաժամանակ դանդաղեցնեն տեմպերը:
Էմիրությունը ձգտում է մեծացնել իր արտադրական եւ լոգիստիկ հատվածը ծրագրի շրջանակներում: Պետական ծախսերը առաջիկա 10 տարիների ընթացքում կհասնեն 700 միլիարդ դիրհամի՝ մեկ տասնամյակ առաջվա 512 միլիարդ դիրհամի փոխարեն:
Քաղաքն ավելի քան մեկ տասնամյակ եղել է տարածաշրջանի կոմերցիոն մայրաքաղաքը, սակայն Սաուդյան Արաբիան նույնպես ձգտում է ընդլայնել իր դերը որպես բիզնես եւ առեւտրի կենտրոն՝ թագաժառանգ արքայազն Մուհամմեդ բեն Սալմանի «Տեսլական 2030» զարգացման ծրագրին համապատասխան:
Դուբայն ընդունել է օրենսդրական փոփոխությունները եւ մեղմացրել սոցիալական սահմանափակումները, որպեսզի այն գրավիչ պահի օտարերկրյա ներդրողների եւ տաղանդների համար: Տարին սկսվել է ալկոհոլի 30 տոկոս հարկի վերացմամբ։ Անցյալ տարի ԱՄԷ-ն հանել է չամուսնացած զույգերի համատեղ ապրելու արգելքը եւ անցել երկուշաբթիից ուրբաթ աշխատանքային շաբաթվա: Նա նաեւ վիզաներ է մտցրել, որպեսզի օտարերկրացիներին հնարավորություն տրվի աշխատել, ապրել եւ սովորել առանց հովանավորի անհրաժեշտության:
