նախընտրելի դարձնել
Եվրասիա միջազգային համալսարանում հուլիսի 16-ին կայացավ Հնդկաստանի ամենախոշոր՝ ITV մեդիաընկերության NewsX հեռուստաընկերության հետ համատեղ կազմակերպված «Խաղից դուրս. մարզական մեդիա ապագայի միտումները ու նորամուծությունները» (Beyond the Game: Innovating the Future of Sports Media) խորագրով միջազգային մեդիա համաժողովը:
Միջոցառմանը մասնակցում էին Հայաստանի և Հնդկաստանի մեդիաոլորտի ներկայացուցիչներ, մարզական մեկնաբաններ, ուսանողներ:
Համաժողովի շրջանակներում Հնդկաստանի NewsX հեռուստաընկերության համահիմնադիր, Inception Global մեդիա հարթակի հիմնադիր, մի քանի տասնյակից ավելի գիտական հոդվածների և հինգ գրքի հեղինակ Սունիլ Կարլան ներկայացրեց մարզական լրագրության ժամանակակից միտումներն ու զարգացման հեռանկարները:
Համաժողովի շրջանակներում կազմակերպված պանելային քննարկմանը NEWS.am կայքի լրագրող, Expert հաղրոդման հեղինակ Թագուհի Մելքոնյանը պատմեց NEWS.am լրատվական գործակալության 15-ամյա գործունեության մասին` ներկայացնելով մեր խմբագրությունում արհեստական բանականության գործիքների կիրառման փորձը, ինչպես նաև այն մասին, թե ինչպես ԱԲ-ն ապագայում կփոխի մեդիադաշտը:
Նույն օրը Հնդկաստանի առաջատար հեռուստաընկերության ներկայացուցիչ Սունիլ Կարլանը հայ մասնագետների համար վարպետության դաս անցկացրեց՝ ներկայացնելով մարզական մեդիայում աշխատելու ժամանակակից պահանջները, ինտերակտիվ բովանդակության ստեղծման առավելությունները՝ կիսվելով օլիմպիական խաղերի և համաշխարհային սպորտային հեղինակավոր իրադարձությունների լուսաբանման իր փորձով:
