ԱՄՆ նախագահ Դոնալդ Թրամփը NBC News հեռուստաալիքին տված հարցազրույցում կասկած է հայտնել, որ Իրանի նոր գերագույն առաջնորդ այաթոլա Մոջթաբա Խամենեին ողջ է։

«Ես նույնիսկ չգիտեմ՝ նա ողջ է, թե ոչ։ Առայժմ ոչ ոք չի կարողացել նրան ցույց տալ։ Լսել եմ, որ նա ողջ չէ, և եթե դա այդպես է, ապա նա պետք է իր երկրի համար շատ խելացի քայլ անի, որը կապիտուլյացիան է»,- ասել է Թրամփը։

Միևնույն ժամանակ նա Խամենեիի մահվան մասին տեղեկությունն «ասեկոսե» է անվանել։

ԱՄՆ նախագահը նաև հրաժարվել է հայտնել՝ արդյոք կա իրանցի որևէ կոնկրետ առաջնորդ, որին նա կցանկանար տեսնել Իրանի գերագույն առաջնորդի պաշտոնում։

«Մենք ունենք ողջ մարդիկ, որոնք կարող էին հիանալի առաջնորդներ դառնալ երկրի ապագայի համար»,- ասել է Թրամփը։

Հարցին՝ արդյոք նա կապ է պահպանում հնարավոր առաջնորդներից որևէ մեկի հետ, ԱՄՆ նախագահը պատասխանել է. «Չեմ ցանկանում այդ մասին խոսել։ Չեմ ցանկանում նրանց վտանգի ենթարկել»։

ԱՄՆ պաշտպանության նախարար Փիթ Հեգսեթը ուրբաթ հայտարարել էր, որ այաթոլա Խամենեին «վիրավոր է և, հավանաբար, այլանդակված», և նրա գրավոր ուղերձն անվանել է «թույլ»։