Գլխիս մեջ չի տեղավորվում՝ ինչպես կարելի է լինել այսքան ցինիկ ու մեծամիտ. Ռուբեն Մելիքյան

Իրավապաշտպան, «Իրավական ուղի» ՀԿ համահիմնադիր Ռուբեն Մելիքյանը ֆեյսբուքյան գրություն է արել, որում անդրադառնում է վարչապետի խոսնակ Մանե Գևորգյանի մեկնաբանությանը, թե ինքը որևէ խնդիր չի տեսնում հոլովակում, որը ցուցադրվել է Երևանի Հանրապետության հրապարակում տեղադրված մեծ էկրանով և որ մարդու իրավունքների պաշտպանը չափազանցրել է, երբ մտահոգություն է հայտնել այդ առիթով։

«Գլխիս մեջ չի տեղավորվում՝ ինչպես կարելի էր այդ հանցավոր տեսանյութը ոչ միայն նկարել, այլև հեռարձակել Հանրապետության հրապարակում։

Գլխիս մեջ չի տեղավորվում՝ ինչպես կարելի է լինել այսքան ցինիկ ու մեծամիտ. Մանե Գևորգյանը, փաստորեն, որևէ աննորմալ բան չի տեսնում հայտնի տեսանյութի հրապարակման մեջ, քանի որ հայհոյանքը ձայնով քողարկվել է։ Իսկ որ իշխանության քննադատներին գնդակահարելու մասին է ի լուր աշխարհի հայտարարվում՝ դա ոչինչ...

Հայկական Էլչիբեյը պետք է հեռանա, որ շանս ունենանք, նախ, իրականությունը տեղավորել մեր գլուխների մեջ, հետո էլ՝ ինչ-որ կերպ հաղթահարել այս դավաճանների խմբակի բերած ազգային արհավիրքը»,– գրել է Ռուբեն Մելիքյանը։

Հիշեցնենք, որ մարդու իրավունքների պաշտպան Արման Թաթոյանը հանդես էր եկել հայտարարությամբ, որով իր մտահոգությունն էր հայտնել առ այն, թե ինչպես կարելի է Հանրապետության հրապարակում ցուցադրել տեսանյութ, որում տրվում են սպանության սպառնալիքներ ու խրախուսվում է բռնությունը։ Նա նաև տեղեկացրել էր, որ պատասխանատու պաշտոնյայի հարցով կզբաղվի անպայման։