Նախընտրելի
Ճապոնիայի վարչապետ Ֆումիո Կիսիդան կքննարկի Կիեւ այցելելու հրավերը՝ կախված «տարբեր հանգամանքներից», սակայն դեռ ոչինչ որոշված չէ։ Այս մասին Կիսիդան ասել է Ուկրաինայի նախագահ Վլադիմիր Զելենսկու հետ հեռախոսազրույցում, փոխանցում է Reuters-ը։
Կիսիդան նաեւ հաստատել է, որ Տոկիոն լիովին աջակցում է Ուկրաինային։ «Ես վճռականորեն դատապարտել եմ ռուսական շարունակվող ագրեսիան եւ հայտարարել եմ, որ Ճապոնիան կանի հնարավոր ամեն ինչ՝ օգնություն ցուցաբերելու համար, այդ թվում՝ ձմեռը հաղթահարելու համար, որպեսզի պաշտպանի ուկրաինացի ժողովրդի կյանքը»,- լրագրողներին ասել է Կիսիդան։
Ավելի վաղ նախարարների կաբինետի գլխավոր քարտուղար Հիրոկազու Մացունոն հերթական մամուլի ասուլիսում ասել էր, որ նախագահ Զելենսկու գրասենյակի ղեկավար Անդրեյ Երմակը Կիեւում Տոկիոյի դեսպանի միջոցով Ուկրաինա այցելելու հրավեր է ուղարկել Կիսիդային։
Կիսիդան հաստատել է, որ ստացել է հրավերը, սակայն ասել է, որ դեռ ոչինչ որոշված չէ։ «Ես կցանկանայի դա դիտարկել տարբեր հանգամանքների լույսի ներքո»,- հավելել է նա։
Հաջորդ շաբաթ առանցքային դիվանագիտական շրջագայության ընթացքում Կիսիդան կայցելի G7-ի անդամ մյուս երկրների մեծ մասը, նախքան Ճապոնիան կհյուրընկալի G7-ի տարեկան գագաթաժողովը մայիսին Հիրոսիմայում:
