«Խելացի» զուգարանը, որը նկարագրված է Nature Biomedical Engineering գիտական պարբերականում, կարող է վերահսկել իր տիրոջ առողջական վիճակը, ինչպես նաեւ վտանգավոր հիվանդությունները հայտնաբերել զարգացման վաղ փուլերում, հայտնում է The Guardian-ը:
Նախագծի հեղինակներին հաջողվել է մշակել բիոտեխնոլոգիական համակարգ, որը կարելի է օգտագործել սովորական զուգարանակոնքի հետ կապելով: «Խելացի» զուգարանը աշխատում է ինքնավար ռեժիմով եւ չի նախատեսում մարդու կողմից որեւիցե բարդ միջամտություն:
«Ո՞րն է մեր համակարգի հիմնական առավելությունը: Այն, որ դուք ախտորոշումը ստանալու համար արտասովոր ոչ մի բան անելու կարիք չունեք: Դուք պարզապես զուգարան եք գնում, իսկ մնացյալ ամեն ինչն անում է «խելացի» համակարգը: Մեր մշակումը կարող է հայտնաբերել մի ամբողջ շարք վտանգավոր հիվանդություններ՝ սկսած միզուղիների ինֆեկցիոն ախտահարումներից եւ ավարտած շաքարային դիաբետով ու աղիների պաթոլոգիաներով»,- ասում են հրաշք զուգարանը ստեղծողները՝ նշելով, որ ախտորոշման համար կիրառվում են տարբեր քիմիական հաղորդիչներ, ինչպես նաեւ արհեստական ինտելեկտին միացված խցիկներ:
Զուգարանը կարող է հետեւել ընտանիքի մի քանի անդամների առողջության ցուցանիշներին. օգտվողների նույնականացման համար նախատեսված է մատնահետքերի սքաներ: «Խելացի» համակարգը հավաքում է հիվանդությունների ախտորոշման համար այնպիսի կարեւոր տվյալներ, ինչպես զուգարանակոնքին նստելու ժամանակը՝ բժիշկները կարող են այս տեղեկությունն օգտագործել պացինետներին զգուշացնելու համար թութքի զարգացման վտանգի մասին:
