Եվրահանձնաժողովը դիտարկում է ջրային ռեսուրսների պաշտպանության վերաբերյալ ԵՄ առանցքային դիրեկտիվի վերանայման հնարավորությունը, ինչը կարող է պարզեցնել և արագացնել կենսականորեն կարևոր օգտակար հանածոների արդյունահանման նախագծերի մշակումը։ Այս մասին վկայում է The Guardian-ի հրապարակած վերլուծությունը՝ հղում կատարելով Watershed Investigations-ին։

Հետազոտության տվյալներով՝ ԵՄ կարևոր հումքային նյութերի մասին ակտի շրջանակում «ռազմավարական» կարգավիճակ ստացած 33 նոր կամ ընդլայնվող հանքարդյունաբերական նախագծերի ավելի քան կեսը գտնվում է այն տարածաշրջաններում, որտեղ վերջին երկու տասնամյակների ընթացքում գրանցվել է ջրային ռեսուրսների կայուն կրճատում (ըստ NASA-ի արբանյակային տվյալների)։ Օբյեկտների գրեթե կեսը գտնվում է վերջերս երաշտ ապրած գոտիներում, մոտ մեկ քառորդը՝ արդեն իսկ ջրի էական պակաս ունեցող շրջաններում։

Հանքարդյունաբերությունը համարվում է առավել ջրատար ճյուղերից մեկը․ ջուրն անհրաժեշտ է հանքաքարի վերամշակման, փոշու ճնշման, թափոնների կառավարման և հանքերի ջրազրկման համար։ Նույնիսկ ժամանակակից վերաշրջանառության համակարգերի կիրառման դեպքում սպառումը մնում է բարձր, ինչը մեծացնում է ճնշումը գետերի, ստորերկրյա ջրերի և ջրամատակարարման վրա՝ հատկապես չորային տարածաշրջաններում։

Վերլուծաբանների կարծիքով՝ հատկապես խոցելի են Իսպանիան, Պորտուգալիան և Հունաստանը, քանի որ նոր նախագծերի զգալի մասը գտնվում է հենց այնտեղ։ Իսպանիայում, օրինակ, նախկինում արդեն սահմանվել էին ջրի ծայրահեղ պակասի ռեժիմներ, այդ թվում՝ 2024 թվականին Կատալոնիայում գրանցված ճգնաժամը և Անդալուզիայում սահմանափակումները։

Ընդհանուր առմամբ, ԵՄ-ը 47 նախագիծ է ճանաչել ռազմավարական, որոնցից 33-ը՝ հանքարդյունաբերական։ Այդ կարգավիճակը հնարավորություն է տալիս արագացնել թույլտվությունների տրամադրումը և վարչական ընթացակարգերի անցումը։ Քննարկվող բարեփոխման շրջանակում դիտարկվում է նաև ԵՄ Ջրային շրջանակային դիրեկտիվի վերանայումը, ինչը, բնապահպանական կազմակերպությունների գնահատմամբ, կարող է թուլացնել բնապահպանական գործող պահանջները։

Բնապահպանական հասարակական կազմակերպությունները նախազգուշացնում են, որ նորմերի մեղմացումը կարող է հանգեցնել ջրային ռեսուրսների վիճակի վատթարացման։ Ոլորտի ներկայացուցիչները, հակառակը, պնդում են, որ խոսքը շրջակա միջավայրի պաշտպանության թուլացման մասին չէ, այլ իրավական որոշակիության բարձրացման և ընթացակարգերի արագացման։

Եվրահանձնաժողովի ներկայացուցիչը հայտնել է, որ բոլոր ռազմավարական նախագծերը գնահատվում են անկախ փորձագետների կողմից և պարտավոր են համապատասխանել ԵՄ բնապահպանական օրենսդրությանը, ներառյալ ջրի և բնակչության առողջության պաշտպանության պահանջները։