ԱՄՆ Քաղաքացիական ավիացիայի դաշնային վարչությունը (FAA) չեղարկել է երկրի 40 խոշորագույն օդանավակայաններում օրական սպասարկվող չվերթների թվի ժամանակավոր սահմանափակումները՝ կապված դաշնային կառավարության աշխատանքի ֆինանսավորման (շաթդաունի) ռեկորդային երկարատև դադարեցման ավարտի հետ։ Այս մասին, հղում անելով FAA-ի ղեկավար Բրայան Բեդֆորդին, հայտնել է Reuters գործակալությունը։

Նրա խոսքով՝ ընդունված որոշումը կապված է այն բանի հետ, որ իրենց աշխատանքը դադարեցրած ավիադիսպետչերները սկսել են վերադառնալ ծառայության և կադրային խնդիրը աստիճանաբար սկսել է լուծվել։ Նաև FAA-ն չեղարկել է ավելի վաղ մտցված տիեզերական սարքերի գործարկման սահմանափակումները։ Նոյեմբերի 14-ին վարչությունը նվազեցրել է ավիաընկերությունների համար չեղարկման ենթակա պարտադիր չվերթների պահանջները՝ իրենց թռիչքային ժամանակացույցի 6%-ից մինչև 3%-ը։

ԱՄՆ դաշնային կառավարության աշխատանքի մասնակի դադարեցումը (շաթդաունը) սկսվել է հոկտեմբերի 1-ի կեսգիշերին՝ ֆինանսավորման բացակայության պատճառով, քանի որ Կոնգրեսում իշխող Հանրապետական և ընդդիմադիր Դեմոկրատական կուսակցությունների ներկայացուցիչները չէին կարողացել համաձայնության գալ մի շարք ծախսային հոդվածների շուրջ, այդ թվում՝ առողջապահության ոլորտում։ ԱՄՆ նախագահ Դոնալդ Թրամփը նոյեմբերի 12-ի երեկոյան ստորագրել է դաշնային կառավարության աշխատանքի ֆինանսավորումը մինչև 2026 թվականի հունվարի 30-ը ներառյալ շարունակելու մասին օրենքը։ Այսպիսով, ԱՄՆ պատմության մեջ ռեկորդային շաթդաունը հաղթահարվել է 43-րդ օրը։

Շաթդաունը հանգեցրել է ավիադիսպետչերների մի մասի աշխատանքի դադարեցմանը, ինչը հոկտեմբերի 1-ից առաջացրել է տասնյակ հազարավոր ավիաչվերթների չեղարկումներ և ուշացումներ։ FAA-ն հայտնել է, որ ԱՄՆ օդային երթևեկության կառավարման հիմնական կենտրոնների մոտ կեսը կադրերի պակաս է ունեցել։ Նոյեմբերի 14-ից ավիադիսպետչերները և ավիածառայությունների այլ աշխատակիցներ սկսել են վճարումներ ստանալ՝ ի հաշիվ շաթդաունի ընթացքում առաջացած աշխատավարձի պարտքի։